ZOTUI THIANG

Hriattirna

Wed, 29 Sep 2010 11:44:00 +0000

Zotui Thiang min hlutpuitu zawng zawngte,

http://zotuithiang.webnode.com ah zawk le....

Mizo Hnam tan,

Nang leh kei tan,

Zotui Thiang

Mizo Typical Village, Reiek, Mizoram

Wed, 29 Sep 2010 09:35:00 +0000

Der Thiam Mi U - Daisy Hmar (MIZO)

Tue, 28 Sep 2010 16:15:00 +0000

Mi Huaisen

Tue, 28 Sep 2010 16:13:00 +0000

Butch O’Hare:

Indopui 2-na hun lai, 1942 Feb.20 tuk chuan Pacific tuipui chhim lama awm America indo thlawhna phurtu Lawng Lian - Lesington atang chuan Japan Lawng han bawm(bomb) turin American pilot rual chu an thlawk chhuak ta a. Thui pawh an la thlawk hman lo tihah chuan Butch O'Hare-a chuan a thlawhna tui a han en a, Japan Lawngchawlhna thleng daih tur tui a thlawhnain a lo pai lo tih a hmu a. An hotute thu ang chuan an Lawng lam pan chuan a kir leh ta ringawt a. Chutih lai tak chuan Japan ralbeih thlawhna rual, America Lawng bawm (bomb) tura thlawkte a tawk ta thut mai a! Japan Lawng lama thlawk a thiante han pun turin hun a awm tawh si lo. An Lawnga ralbeih thlawhna zawng zawng lah chu Japan Lawng bawm (bomb) turin an thlawk chhuak vek a ni si a. Chuvangin an Lawng chuan invenna engmah a nei lo tih a hre khiau bawk nen...Butch O'Hare-a tan chuan tih theih pakhat chauh a awm ta, chu chu a ralthuam neih zawng zawng leh amah pawhin thih-chilha Japan thlawhna rual chu an Lawng thleng thei lo tura hruai pen a ni.

Tichuan , Japan thlawhna rual karah chuan thlawk lutin a ralthuam neih chhun chhunte nen a kap a, amah pawh thih inhuamin an thlawhna thla emaw an mei emaw sut chhiat tumin a bei ta fat fat mai! Nakin nakinah chuan Japan pilot-ho chu mangangin America Lawng lam ni lo, kawng dang zawhin an tlan chhe ta! Butch O'Hare-a chuan Japan thlawhna 5 lai a tichhe hman a! An Lawng leh a chhunga awmte a chhanhim ta a ni!

A huaisen vang leh a thiltih ropui tak, chhuanawm tak avang chuan Congress Chawimawina Tangkapui hlan a ni a. Chu mai bakah America ram thlawhna kerawn lun berte zing ami, Chicago khawpuia thlawhna kerawn- "O'Hare Airport" pawh hi amah Butch O'Hare-a hming chawia din a ni asin! Chicago khawpui i kal a, he thawhna kerawn chhinchhiah tlak tak i thleng a nih chuan Butch O'Hare-a lim (statue) leh a Chawimawna dawn Tangkapui te hi en hmaih hauh suh ang che.

Easy Eddie:

Tun hma deuh khan Chicago khawpuiah Easy Eddie-a tia koh ukil pakhat hi a awm a. Chutih hun lai chuan misual hmingthang , ruihhlo lama sumdawng thin leh mi thah hmang zet- Al Capone-a(1899-1941) hian Chicago khawpui chu a awp titih hial! Chu pa- Al Capone-a chu sawrkarin manin tan in (lung in)-ah khung thin mah se, ukil hmingthang tak leh thiam tak - Easy Eddie-a chuan eng tin tin emawin a chhan chhuak zel thin a, sawrkarin a phuar rei thei lo a ni ber mai. Chutiang a nih avang chuan Easy Eddie-a chuan misual turu Al Capone-a hnen atang chuan pawisa tam tak a dawng thin. Chicago khawipui lai-li-ah in hmun nuam tak neiin an chhungin an khawsa a.

A fapa chu zirna sikul tha ber berah kaltirin a mamawh tinreng thawmhnaw tha tha, car leh thildangte a leisakin a pe thei. Mahse, Easy Eddie-a chuan a fapa hnenah pek theih loh thil pahnih a nei a, chu chuan a rilru a ti-na a, a fapa tan 'Pa' nih a tling lo a ni tih a inhriat chhuah phah a. Thil dang engkim tihsak thei eng ang mah se, "Hmingthanna (good name)" leh a fapa tana " Entawn tlak nihna (good example)" te hi a fapa tan a tihsak thei tlat lo. A chhan chu misual hmingthang, mipuiin-a an huat em em chhan chuak thintu a ni tlat. Chu chuan a fapa tan hming chhiatna a thlen a, a fapa tan 'Pa' entawn tlak a nih loh zia a lantir bawk a ni.

Ni khat chu, Easy Eddie-a chuan a fapa a pek theih loh thil pahnih chungchang chu ngun takin a ngaihtuah ta a, chu'ng thil pahnih a fapa pe thei lova a awm chu zahthlak a ti a, amah leh amah a insit a, 'Pa' nih tling lo a inti hliah hliah. Tichuan , "Ka fapa tan" tiin misual Al Capone-a sualna engkim, sawrkar laka a lo zep rukna zawng zawng chu phawrh chhuakin sawrkarah a theh lut ta! Chu mi a thiltih avang chuan amahin a tuar ngei dawn a ni tih inhre chiang teh mah se, a fapa tan ‘Entawn tlak nih leh Hmingthatna' pek chu a tum ta tlat a! A hnu lawkah misual-hovin an kap hlum ta nge nge a nih kha! Mahse, a fapa tan a nun hial hlan chu a tum a ni tlat! A va'n ti-ropui in, a va'n chan ropui tak em!

A chunga thawnthu pahnihte khi engnge a in-kungkaihna? i ti mai thei. Mahse, a inkungkaih tlat! Nichina kan sawi tak- Butch O'Hare-a kha ukil Easy Eddie-a fapa a ni tlat! He mite Pafa hming hi theihnghilh chi rual a ni lo!!!!

Mizo Zirlai Pawl History (MZP) History

Tue, 28 Sep 2010 12:03:00 +0000

Mizo Zirlai Pawl (MZP) hi kum 1935 October ni 27 ah din a ni a, he pawl hian khawvela Zo hnahthlakte chenna chin tawh phawt chu a huam a ni.Zohnahthlak zawng zawngte ram leh hnam tana mi chenfakawm ni tura buatsaih leh, ram leh hnam hmasawnna kawnga theihtawpa sorkar tanpui hi a zepui a ni. Party politics tel lova sorkar siamthat nana hnathawh chu a hnapui ber a ni bawk. “Tanrual hi chakna” tih thupuia hmangin Mizo zirlai zawng zawngte zingah inpumkhatna te, an chanvo leh dikna humhalhna te, Zoram leh hnam tana mi tangkai nihna te, kuthnathawh uara chawisan nan te, Mizo hnam nun leh zemawi leh tha apiang humhalh a nih nan te, Mizo hnam chimralna laka hum tur te, eiruk leh hlemhlet dona te, Mizoram leh hnam tluchhe tur venna te, Pi leh Pute atanga Zofate luah chin ram rorelna pakhat hnuaia awm lehna tura chawl lova thawh zel chu a thil tumte a ni.

Pawl chhinchhiahna (emblem)-a nghawngkawlin a phurh hi pipute atanga Zofate luah thin Map niin, hemi chhunga mi hi tuna Mizoram State Map a ni. Rawng sen hian MZP chu ram leh hnam chhan nan huaisen taka thawh a inhuam tih a entir a, nghawngkawl leh favah hian thawhrimna pawimawhzia entirin, lehkhabu hian zirlai pawl a nih a entir bawk..Pawl puanzar chu rawng chi hnih niin, a chanve chunglam var (white) leh a hnuai lam hring (emerald green) a ni a, rawng varah hian a senin MZP emblem ziakin, rawng hringah Mizo Zirlai Pawl a vara ziah a ni. Rawng var hian pawl thianghlim entirin a hring hian pawl nung tih a entir bawk.

A din tirh atanga ram leh hnam tana theihtawp a chhuahnaten hnuhma ropui tak tak hnutchhiahin, Mizoram buai 1966 atang khan duhthusamin a kal chak thei ta lova, kum 1980 bawr chho atang khan Mizoram sorkar nen ngaihdan a inan loh avangin mumal takin a kal thei ta lova. Chuvang chuan zirlai pawl hran thahnem tak a lo piang chho ta a.

Harsatna chi hrang hrang avanga a hnathawh ropui tak tak a chawlhsan mek chu din thar a nih leh nan zirlai pawl hrang hrang lo piang chhuak, heng — United Mizo Tribal, Students Union (UMTSU), All Mizo, Students Association (AMSA), Mizo National Students Joint Action Committee(MINSAC), Students Union Joint Action Committee (SUJAC), All India Mizo Students Federation (AIMSF) — te chuan an nihna theuh dahthain Mizo zirlai, ram leh hnam hmasawnna duhtute chuan he pawl, MZP ah hian huang khatah lutin Dt. 14.8.1993 atang khan an awmho leh ta a ni.pawl hi Firm & Society Act hnuaiah No. 35 of 1969-70 a register a ni a. Mizorama pawl hlun ber pawl leh langsar tak, Mizo zirlai zawng zawngte lenna hmun leh Inpui ber a ni.

MZP General Headquarters-ah hian Elected Office Bearers 6 awmin

Appointed Secretary 10 leh Executive Member 50 an awm a. Adviser 8 leh Legal Adviser 2 awmin Editor, MZP Chanchinbu leh NESO Represent te chu Ex-Officio Committee Member an ni.

Tunah hian MZP hmunpui ber General Headquarters chu Aizawl niin, Zohnahthlak luah chin ram chhung Churachanpur,Manipur leh Behliangchhip,Tripura-ah te Headquarters neiin Mizoram state chhung, heng — Serchhip, Biate, Champhai, Ratu, Kolasib, Mamit, Zawlnuam, Saitual, Lunglei leh Khawzawl — ahte hian Headquarters a awm a, a vaiin 12 a ni. General Headquarters leh Headquarters hrang hrang hnuaia khaw 41, heng — Hnahthial, Chawngte, Tlabung, Lungsen, Tawipui, Haulawng, Bunghmun, Bairabi, Vairengte, Bilkhawthlir, Thingdawl, Kawnpui, Thenzawl, Chhiahtlang, Chhingchhip, Tlungvel, Khawlailung, N.Vanlaiphai, E. Lungdar, Bungtlang, Hnahlan, Khawbung, Sialhawk, Chawngtlai, Khawhai, Rawpuichhip, W. Phaileng, Seling, N.E.Khawdungsei, Kepran, Sawleng, Vaitin, Rabung, Kawlkulh, Ngopa, Kawrthah, Darlawn, Aibawk, Reilek, Thingsulthliah leh Kanhmun — ahte hian Sub-Headquarters a nei a, hengho hnuaiah hian Branch tam tak a awm bawk.

Mizoram College hrang hrang 31 leh Women Polytechnic, Aizawl leh Lunglei Polytechnic-a Students’ Union theuhte nen inthlunzawmin, henga Vice President leh General Secretary theuhte chu an awmna hmun Hqrs/Sub-Hqrs. ahte Ex-Officio Committee Member an ni a, Mizoram University hnuaia Students Union President leh General Secretary te chu Ex-Officio Committee Member an ni bawk.

Zohnahthlak hnam hrang hrangte inpumkhat leh, hnam khat, chhul khat chhuak kan nihnate a taka hmanga unau kan nihna vawng nung tlat turin theihtawpin hma a la thin a, chi peng nghenchhan zirlai pawl (Tribe based Students’ Organisation) chi hrang hrang pariat (8) heng — Hmar Students Association(HSA),Lai Students Association (LSA), Mizoram Bawm Students Association(MBSA),Ralte Students League (RSL), Mara Students Organisation (MSO), Ranglong Students Union (RSU), Thado Kuki Students Union (TKSU) leh Siamsin Pawlpi (SSPP) — te nen inzawmin, MZP ah an in-affiliate vek a, lungrual tlang taka thawkin mawhphurhna inhlan tawn thin a niin, harsatna tawhte insutkiansak tawn thin a ni bawk.

Tin, India hmarchhaka state hrang hrang zirlai pawlte inhlawmkhawmna North East Students’ Organisation (NESO) ah hian Constituent Unit niin, tunah hian he pawla Vice Chairman nihna a luah mek a ni.

Zirlai pawl a nih angin zirlaite hamthatna turin MZP hian theihtawpin hma a la thin a, a din champha 27th October chu Mizoram sorkar chuan MZP ngenna angin ‘Zirlaite Ni’ ah a puang a, he ni hi Mizoram pumah zirlaite tana tangkai thei ang ber leh chhinchhiahtlak taka hman thin a ni.

Chimralna laka Zofate himna tura a hmalakna kawng hrang hrangah thil dik lo titute huaisen taka doin, thil tha titute erawh a chawimawi thin a. Zofate dinchhuahna turah Mizoram mai ni lovin, Central sorkar thlengin a tul dan ang zelin hma a la thin a, enhran leh thlauhthlak bik nihna ata dinchhuahna tur leh, Mizote vohbik kan nihna leh hungbik kan nihnate chu a nghin lohna turin theihtawp a chhuah thin a ni.

Tin, mite tih theih ang hi Mizoten kan ti thei a ni tih a hriat angin a takin Mizoten kan nunpui nan theihtawpin hma a la thin bawk.

“Mizo zirlaite — kan ram leh hnam tan”

ELECTED OFFICE BEARERS 2009-2011

President V.L.Krosshnehzova

Vice President S.Lalrinawma

General Secretary H.Lalremsiama

Asst General Secretary Lalsangzuala Ngente

Treasurer Lalhmachhuana

Finance Secretary Lalnunnema Ralte

‘I ram leh hnam a boral chuan nangpawh zuah i ni bik lovang’

Thulakna: http://mzpmizoram.org

Sodom leh Camera

Tue, 28 Sep 2010 11:53:00 +0000

A bialpa hmaah nula pakhat a inphelhruak a, a bialpa chuan duhtawkin a thla a la a, mahse, a darh ta si!

"Ka rilru a dam thei lo... Rilru chu a na duh khawp mai. Ka ngaihtuah chhuah chang hian ka mittui a tla thin," tiin chu nula chuan a dinhmun Zozam Weekly a hrilh.

He nula hian "teen ka la ni" a ti a, kum 19 aiin a la upa lo tihna a ni. Mahse, tleirawl te ni mah se khawvel hmaah saruak leh inhawng sain a lang ta a, a mang a ang hle.

"A....inngaihzawn lai thil a nia, kan lo inringtawk bawk a ni ang..." a ti a, "Thlalak hi ka ngaina lo a, lak pawh ka la ngai mang lo. |awngkam an thiam te pawh a ni ang, a... ka at vang a ni ang. Ka in-pose a, kan ti ve a ni mai," a ti bawk.

He nula dinhmun anga ding hi Mizo zingah sawi tur an awm ta nual mai. Mahse, ani chu a vannei hlauh; a thlalak darh ta hi mipat hmeichhiatna an hmang lai a ni lo a, inphelhruak 'naran' mai a ni. (Tunlai khawvelah chuan, hetianga vanduai rau rau-ah mipat hmeichhiatna hmang lai ni lote chu "saruak thlalak naran" tiin an sawi theih ta der mai!)

NGO pakhat- New Life Home Society chuan nawhchizuar 300 vel zet nun kawng dika hruai tumin an enkawl a, an zinga thenkhat chu anmahni dawrtute'n thla an lo lak thin avangin an mangang thin.

"Anmahni dawrtute hian an hriat miah lohvin mipat hmeichhiatna an hmanpui laiin thla an lo la a, a hun laia an ruih avang te'n an lo hre lo a, an hriatchhuah hnu-ah chuan an mangang thei khawp mai," tiin New Life Home Society project manager N Samuel-a'n Zozam Weekly a hrilh.

Nikum lamah khan he NGO te'n an enkawl mek nawhchizuar pakhat chuan tiang thilah hian harsatna a tawk a, police te hnenah a tlanlut ta tawp mai a ni. Police te'n an lo pui a, chu nawhchizuar kawmtu chu hrechhuakin, a mobile phone handset-a video chu an paihsak ta a ni. Chu nu chu a lawm teh asin!

Nawhchizuar dawrtute zingah chutianga thla la ru chu an awm thin a, mahni ngaihzawngte nena an khawsa lai ngei la ru thin pawh an awm. La ru mai ni lo, a tu ve ve pawhina an remtih dunna ngeia video-a la thin pawh an awm. Chung chu research tih ngai lo khawpin a chiang awm e.

Mi tam takin mipat hmeichhiatna hmang lai video an nei a, saruak thlalak ve hrim hrim a tam hle bawk. Mi hriat hlawh takte pawh an awm nghe nghe. Hemi chungchang hi tun hnai kum hnih/3 vel kal taa Mizoram titi ber pakhat pawh a ni.

YWCA Family Councelling Centre-a councellor Lalhriatpuii chuan: "Blue film lei tur a tam em em a, internet atangin duhtawkin a download theih bawk. Chumi hnu-ah thiante nena titi-na ber a ni zui a, hei vang hian sex hi kan pawisa lo hle a, thla han lak te pawh kan hreh ta lo a ni thei ang," tiin a ngaihdan Zozam Weekly a hrilh.

"IT khawvel ken tel a ni a, internet atanga blue film download tur a tam bakah camera ni se a tam tawh em em a, inkhuahkhirh hleih theih a ni lo. 'Ti suh' tih ringawt theih a ni lo. An film enah te hetiang a tam chuan, sawi tawh angin, pawisak lohna a lo piang a, camera a tam si, mobile phone hmang pawhin duhtawkin thla a lak theih a, miin sex an hmang duh a nih chuan thla han lak mai pawh a awlsam em em a ni. Sap kan ngaisang a, an awm dan kan copy a, mipat hmeichhiatna hman khawloh pawisa miah lote film en tur a tam si," a ti bawk.

"Hmeichhiate hian mipa hi heti lamah hi chuan ring lo se a dik ka ring. An insum thei lo a, sex an lo hmang a nih pawhin thlalak hi chu duh lo tawp rawh se, miin an lo la ru a nih chuan thudang a ni. Hmeichhiate hi mipa bumin an awm tur a ni lo," tiin thurawn a pe a ni.

"Mobile phone te a awm tawh a, awlsam takin thlalak leh video te kan inthawn thei a," tiin psychiatrist Dr C Lalhrekima chuan a ngaihdan a sawi.

"A thuhrimah tun hma kha chuan hetiang hi a tih theih loh. Thlala tur chuan photo house-a kal a ngai a, a inphelhruah theih loh tluk a ni. Tuma'n hmelhriat lohte hmaah an inphelhruak duh lo ang. Tunlaiah erawh chutiang a ni tawh lo a, mahni room chhungah bialpa te nen chauh te an awm a, tawngkam thiam deuhva mipain an han thlem chuan an tlu ta mai thin ni tein a lang," a ti bawk.

Sex video chhuichiangtu Synod Social Front lam chuan 95% chu mahni duhthu ngeia lak niin an sawi.

October ni 27, 2008-ah khan Mizo sex video chungchang zirchian an rel a, chumi bawhzui chuan Social Front hian an zir ta a ni. August ni 26-ah khan Synod Social Front hian Seminar-cum-Workshop huaihawtin an thil zirchhuah hi an thet a ni.

"Heng film-a 95% hi chu anmahni duhthu ngeia mobile phone camera-a an lak, midang an entirte'n an copy-sak atanga darhzau ta niin a lang ber a. Camera pangngaia midangin an laksak hi chu hmuh theih chinah video clip pahnih a awm a. Pakhatah hian hmeichhia hi hrai ruih niin a lang a, pakhat zawkah hian hmeichhia hi Manipur lam nula (Mizo hnahthlak) niin a hriat a, ani hi chu mihur kan tih ang hi niin a lang," tiin research titute chuan an ziak.

Social Front hian sex video clip 50 an zir a, "Sex video clip-te hi hmeichhe remtihnaa lak ni ngeiin a lang bawk," an ti.

"Sex video-ah hian nupaa khawsa lai hi pahnih a awm a, hei hi chu midang en atana ti lovin anmahniin a hnua an en atana lak niin a hriat a. Mahse, an lakna camera a chhiat avangin a cassete a tang a, siam tura an dahnaah a siamtuin a tih leak-out a ni," an ti bawk.

Synod Social Front buatsaih, Seminar-cum-Workshop-ah hian Vanlalrema Vantawl leh Laltlansangi Fanai te'n 'Pornography and Sex Video: The Present Scenario' tih paper an buatsaih a, anni hian sex video an hmuh theih ang ang 70 lakhawmin an zir a, chuta an thil hmuh chu paper-ah hian an tarlang a ni.

"Sex video hi eng zat chiah nge awm tih finfiah a har hle a, Mizo telna ni ngeia hriat hmuh theih ang ang 70 lakkhawm a ni. Heng atanga a lan dan chuan mahni duhthu renga la hi 62.85% an ni a. A bak 37.14% (a bikin hmeichhia) chuan mipain camera/mobile phone-in an la tih an hre lo," tiin paper-ah hian an ziak.

"Hmeichhe thenkhat chu rui chatthla an nih loh pawhin rui, tang hlei thei tawh lo an ni a, pawngsuala chhal ngam video 6 aia tlem lo a awm bawk," an ti.

"Mipa leh hmeichhia 1, a ruala inpawlna leh mipa 1 leh hmeichhia 2 a ruala inpawlna video pakhat ve ve a awm bawk a ni," an ti bawk.

"Mizo thalaite hi sex lamah kan inthlahdah sawt hle niina lang, anmahni bakah zirtirtute lam pawhin an pawm," an ti a, "Sex video-a a lan danah thenkhat hi chu hmeichhe tihmualpho tumna rawngkai ni theiin a lang a, fimkhur loh vanga putru a awm bawk.

Hmeichhe rui, che thei lo, remchanga mipain a lakna video emaw lo ruahman lawkte pawh niin a lang," an ti bawk.

Synod Social Front lam chuan: "Heng saruak thlalak leh sex video-te hi a tam ber chu mobile phone hmanga inthawndarh niin a lang," an ti.

New Life Home Society project director N Samuel-a chuan tiang hian a ngaihdan Zozam Weekly a hrilh:

"Mizo sex video-a langte hian mipat hmeichhiatna hi an vawi khat hmanna a ni lo tlangpuiin a lang a, sex an hmanpuite nen vawi 2/3 an hman hnu-ah thlalak an ngam ta thin niin a lang," a ti.

"Intihtheihna te a ni thei a, mawl vang a ni thei bawk a, saruaka thla la lo tur leh sex hmang lai video-a la lo tur hian inzirtir kan ngai khawp mai," a ti bawk.

Thulakna: Zozam Weekly News

OCTOBER-AH MIZORAM WATCH NEI LEH DAWN

Tue, 28 Sep 2010 09:32:00 +0000

Prism leh a thawhpui pawl hrang hrang buatsaihin October thla tawp lam khian Mizoram Watch neih leh tur a ni.

Mizoram Watch hi Congress kaihhruai sorkarin 2008 MLA General Election-a an party election manifesto an bawhzui dan thlirhona hun a ni a. HE HUNAH HIAN A DUH APIANG IN THU SAWI THEIH A NI DAWN A NI.

Mizoram Watch lo awm tur hi programme vawi 5-na tur a ni a. April, October leh December, 2009 leh April 2010-ah neih tawh a ni a. Heng programme-ah te hian booklet – Phawngpui, Lengteng, Sur tlang leh Hrangturzo te chhuah a ni a. April leh October 2009 leh April 2010 te-a programme hi video CD siam vek niin a duh tan Informa, V – 27/C, Venghlui, Aizawl atangin a soft copy lak theih reng a ni.

October-a programme lo awm turah hian booklet – Lurh siam leh tur a ni a. Hetah hian sorkar hmalakna bakah hemi nia thusawi tu te thusawi hi ziah kan duh a. Chuvang chuan thusawi duh chuan mahni thusawi tur ziak October ni 15, 2010 aia tlai lovah thehluh vek tur a ni a. Thusawi hi minute 5 a rei tura ziah tur a ni a. Programme neih nia kal thei lo tur, thusawi duh tan pawh ziaka thusawi duh thehluh tur a ni a. Thusawi hi Mizoram sorkar hmalakna (a theih hram chuan manifesto related) fakna emaw sawiselna emaw a ni tur a ni a. Tawngkam uchuak hman phal a ni lo a ni.

Programme hi local TV-a live telecast tum a ni a. Chumi bakah Mizoram chhunga cable TV zawng zawng te video CD-a thawn vek tum a ni.

He programme tihlawhtling tur hian Rs 58,500/- mamawh tura chhut a ni a. A duh apiang tan donate theih a ni.

Hlauh Tur ( Sermon )

Mon, 27 Sep 2010 17:11:00 +0000

- Rev.Dr.Zairema

Ka thiante u, ka hrilh a che u,

taksa tihluma chumi hnua

eng mah tih thei tawh lo che u

chu hlau suh u.

Tu nge hlauh tur ka hrilh ang che u;

taksa tihluma, chumi hnu pawha

hremhmuna (Gahenaa) paih theitu

che u chu hlau rawh u.

Ka hrilh a che u,

ani mawlh chu hlau rawh u.

Luka 12:4-7

Isuan Farisai te, an sakhaw lama an theology mi, Dan hre mi, leh Dan zirtîrtute chu a an khum nghek a. Mi vervêk an ni, an zirtîrna, an dawidim lakah chuan fimkhur turin a zirtîrte chu a fuih a. Vervêk tih hi kan tunlai vai tawnga ‘phakar’ kan tih hian a awmzia a phawk bawk viau thei e. A tira an hman dan chu drama-a lemchangtu an sawina a ni.

Lemchangtu chuan ama zia chu a tilang lo a, a chana zia kha tihlan a tum a. A tihlan thiam poh leh actor thiam a ni a, fak a hlawh mai ni loin tunlai phei chuan hlawh tam tak neiin cinema film siamtute chuan an ruai thin a ni. Farisaihote hi Pathian mi ni awm takin an awm a, Pathian mi dik tak lem an chang a ni. Hetianga an khawtlâng leh sakhaw hruaitute tlâktlai lohzia Isuan a rawn tar lan ngam tâk avang hian mipui beiseina chu a sâng hle a ni. An sakhaw kalpui dan mai ni loin an khawtlâng nun pawh a danglam vek dâwnin an hria a, mipuiin an bawr huai huai a; a thusawi ngaithla turin inrap nûlh nûlh khawpa tam mi an lo kal a ni. Hêng mite hriatah Isua chuan Farisaite dawidim, vervêkna laka fîmkhur turin mipui hriatah a zirtîr bîkte kha a zirtîr ta a ni.

Isua zirtîrnaah sakhaw lam leh khawtlâng hotute an lawm lo a, an inthethu tawh a. A hlanga an awmnaah phei chuan zirtîrte kha an khup zal zal tawh ni tur a ni. Pathian ram thurûk an hnênah puan chhuah tawh, thudik an hriat chu thup theih tur a ni lo. Zêp theih tur pawh a ni lo. A rûkin pindan chhûngrila in sawi hi puan darh tur asin, zana in sawite pawh zîngah chuan in chung atanga tlângaupui tur asin; Farisaite hlauin in khup zal zal tur a ni lo. Anni chuan in taksa chu an tihlum thei che u, mahse chu chu engah nge in hlauh, in taksa chauh a ni an tihhlum theih dâwn. Anni chu hlau suh u. Pathianin a hmangaih êm êm che u a, in samzai pakhat pawh chhiar vek a ni. Chawngzawng takngial pawh in Pa chuan a ngaihtuah êm êm a, an thihsawn mai mai pawh a phal lo a ni. Nangni phei chu in samzai chenin a hre vek asin. Chawngzawngte ai chuan in hlu zâwk daih, chuvangin taksa tihlum thei hi hlau suh u. In hlauh tur chu taksa pawh tihluma Gehena meia paih theitu che u hi asin, hei mawlh hi hlauh rawh u. Farisaite hi hlau suh u, Pathian ram thuril Chanchin Tha in dawn thudik leh thil dik in hriat hi in sawi ngam lo tih hi in hlauh ber tur a ni, hei mawlh hi hlauh rawh u.

Gehena hi Jerusalem khawpui bawlhhlawh paihna hmunpui a ni, an hal a, a mût reng a, ruah pawhin a tihlum thei lo. An thil paih tawih lung lah thi sêng lo khawpin a tam. Gehena mei sa tawp thei lo tuar leh thil lung kher zawk zawk reng aia hrehawm a awm lo ang. Thudik in hriat hi in puan ngam loh chuan in thlarau nun chu mei kan reng leh thil lung kher ngut ngut angin a hrehawm dâwn a tihna a ni bawk kan ti thei ang. Pathian hi hremhmuna paihtu tur che u chu a ni lo, ani chuan a hmangaih êm êm che u, nun in neih hi a duh a ni. Nun theihna kawng tichêptu chu Pathian ram thu inthup in hriat in puan ngam lohna hi a ni. Hei mawlh hi a ni hlauh tur chu, thudik sawi ngam loh hi thlarau nun khawih chhe theitu chu a ni.

Tawngkam dang deuh hmangin he thu hi Isuan a sawi bawk, ‘Tu pawh mahni nun humhim tum chuan a chân ang a, tu pawh keimah avang leh chanchin tha avanga a nun chân chuan a hmu ang. Miin khawvêl hi a pumin nei sela, a nun chân si se a tân eng nge sâwt ang? Miin a nun aiah eng nge a pêk theih ang?’ (Mk 8:35-37). Kan taksa nun hi a hlu hle, chu aia hlu chu mihring nun dik tak hi a ni. Miin thu dik an hriat chu an tan a, thih pawh an lo huam thin. Galileo-a chu mi thiam tak a ni a, arsi lam chhui mi a ni. Lei hian ni a hêl a, planet dangte pawh khian ni an hêl a, an kal dan te pawha chhui chhuak a, thla âwklem hun turte pawh a chhût thei vek tawh a ni. Chutih laia Kohhran Roman Catholic chuan, ‘He i zirtîrna hi Bible kalh a ni, i phatsan loh chuan meipuiah kan hal hlum ang che’ an ti a. Hal hlum chu a ngam si lo a, thutak a hriat chu a phat ta a. A thlarau nun chu Gehena meia paih ang maiin a nuam thei lo a, a taksa nun pawh chu rei lo têah a thi ve ta mai a ni. Hmeichhia chu vawi khat a awm khawloh hlauh chuan kumkhuain a chhûngril nun a fuh thei tawh lo. Ei ru leh thamna la pawh a chhia leh tha hriatnain a dem reng, a tih zin hnû erawh chuan a chawlawl tawh a. Hebrai ziaktuin sim tura hruai kir leh rual an ni lo a tih dinhmunah an ding a ni. Kraws thiltihtheihna hi a chhuanawm hle a, mahse Pathian fapa chu an khêngbet nawn leh a ni (Heb 6:6). Kraws thiltihtheihnain a chawi chhuah theih hmain an taksa pawhin a tuar hle thei.

Isua vêkin thlemna a tawh lai khân, ‘Chaw ngawt ringin mihring hi an nung tur a ni lo, Pathian kâ atanga thu chhuak tinrêng an ring bawk tur a ni’ a ti a. Mihring hi rannung ang bawka taksa nei kan ni a, chaw kan mamawh ve tho; amaherawhchu thlarau nei kan ni a, a chaw tur chu Pathian thu chhuak hi a ni. Pathian thu chhuak tih hi Bible thu sawina a ni ber a, mihringin kan culture-a kan din chhohpui mihring chhûng lam thil pawh a kâwk thei bawk, mihring lam mamawh tinrêng a huam a ni. Tûnah hi chuan Mizoramah pawh tûk tin chanchinbu kan chhiar loh chuan kan kim lo riau a, hriat châk tam tak kan nei. Chutiang tel lo nun chu rannung nun hi a ni, thlarau khawvêl lam chhun tel lo nun chu, Pathian lam nena inpawhna nei lo nun Bible-in thi a tih thin chu a ni.

Hman ni lawk khân Rev. C.L. Rema’n chanchinbuah Trojan horse (sakawr) tih a rawn ziak a. Grik-ho lalnu, khawvêla mi hmêltha ber an tih Helen-i chu Troy miten an man a. Chhuh tumin Grik-ho chu an inpun a, Troy-ho kulh chu lâk tumin kum sawm lai an hual tawh a, an la thei lo a. Thingsakawr lianpui an siam a, a keah chuan tawlailir an vuah a. Sakawr chhûng kawrawngah chuan mi eng emaw zât a awm theih a, an mi huaisen leh chak thlante chu an khung a, an tlanchhiatsan der a. Troy-ho chuan an tlanchhe ta tak tak emaw tiin an kulh ata chu an lo chhuak a, Grik-ho bûk ramah chuan an lo kal a, sakawr lim chu an hmu a. Mak an ti hle a, an khuaa hnuh luh an tum a, a len loh avangin Kulh kawngka chu an thiat a, khuaah chuan an hnûk lût ta a, mipui chuan an hmu duh hle mai. Zan mut hnu chuan a chhûnga mi huaisen rual kha an lo chhuak a, khaw vêngtute chu an that a, kulh kawngkhar chu an hawng a, an sipaipuite chu an lo kal a, khua chu an la thei ta a. Tûn thlengin Trojan horse tih chu thil duhawm tak ni awm inbumna thil sawi nân an hmang ta a. He thu a rawn ziak chhan chu kan ram politics-ah hian ram tichhe thei tur inbumna sakawr chu kan hnûk lût ve ang tih a hlau a. Chu inbumna sakawr chu Hindutva hi niin a sawi a. Hindutva sawi uartu BJP chu MP kan thlan pawh khân kan candidate pakhat chuan a tawiawm tur thu tar lan a ni a. Kan ram sawrkar pawhin BJP a chaw lût ta niin a ngai a, Kohhran mite chu fîmkhur ngai hlein a hria. Kohhran mite hlauh tur a tih hi Hindutva hi a ni. Hindutva tih hi Hindu sakhua nen a ngaihzawm bawk a.

Rev. C.L. Rema hi Mizo IAS hmasa pâwla mi kha a ni a, mahse a hna ropui tak chu bansanin Assamese-ho zîngah missionary hna a thawk a. A awm dan hi kan ngaihsan teh lul nen hlauh tura a rawn sawi Hindu sakhua hi kei chuan ka ât vang pawh a ni thei, ka lo hlau lo hle a. Hman deuh atang tawh khân BJP chuan North East-ah hian beihpui thlâkin missionary sing chuang an inla mêk tih sawi a ni tawh a, tûn thleng hian Hindu missionary Mizoramah phei chuan an lo la chhuak lem lo ni awmin ka hria. Lo chhuak se ka lo tirilru hial asin. Kan Mizo Kristiante hian a huau huau mai kan uar ta ni pawhin a ngaih theih a, min rawn kâptu awm se kan that phah zâwkin ka lo ring thin. Mizo Kristian hmasate chu an inunau êm êm mai a, Pathian thu pawh an khel ngun. Chutih lai chuan Tlira chuan zirtîrna dik lo a rawn tichhuak a. Tlira zirtîrna hi tûnlai chuan a liberal hle kan ti awm e, a hun lai chuan modern an vuah a. Kan Kohhran chu modernism zirtîrna hlauhawm tak lakah chuan kan invun hnawh thei ta a, tûnah hi chuan kan conservative bur lutuk deuh emaw tih tur kan ni. Hindu sakhaw mi thiamte hian min rawn bei ve se, rinna lamah kan chak phahin kan chiang sawtin ka lo ring thin. Hindu sakhua hrim hrim hi hlauhawm a ni loin ka hria. An missionary rawn tirhte chuan mi thenkhat chu an la thei mahna. Mizo ngat chu Hindu ni ta kan vâng hle, hmeichhe Hindu pasal neite erawh chu an Hindu ve mai a. Hlauh teh chiam turah ka ngai lo. Sum hmanga min rawn beih a hlauhawm zâwk chu a ni.

India ram hruaitu lian pahnih, Gandhi-a leh Nehru-a kha sakhaw thilah an ngaih dan a inpersan daih mai. Gandhia chu sakhaw mi êm êm a ni a, chuvangin Independence kan neih pawh khân sawrkar siamna lamah inrawlh a tum lo a. Mi tha tak ni mah se Nehru-a chuan sakhua hi engah mah a ngai lo a, phuah chawp dâwt, hlâwkna nei lo niin a ngai a, Pathian awm pawh an chhûng hian an ring lo a ni. India ram mi hi sakhaw lam ngaisâng tak kan nih avang hian kan Constitution-ah chuan tu pawhin zalen takin mahni duh ang tak sakhua kan biak leh theh darh min phalsak a, Nehru-a chuan mi tam zâwk duh dan a nih chuan a remti ve mai a, a ngai pawimawh lo; sakhua hi engah mah a ngai lo a ni. Nehru-a ngaih dan hian communist ngaih dan a thlâwp hle. Communist-ho chuan Pathian a awm a nih pawhin kan mihring nunah a rawn inrawlh a tûl lo, mihring kan fing tâwk. Thil sual tih kan duhna chhan ber chu kan retheih vang a ni, kan sum leh pai dinhmun titha ila, sualna chi tinrêng hi a bo mai dâwn a ni an ti a. Nehru-a pawh hian India ram hi kan rethei êm êm a, sum leh paia kan dinhmun siam that hi sawrkar hnapui ber niin a hria. Chuvangin communist sawrkar, Russia lam chu kan thle ta a. Kristian ramte nen chuan kan inhlat ta tial tial a. Russia siam thlawhnate leh râlthuamte kan lei a. Kan pilot huaisen, thiam tak takte chu Russia siam thlawhnain a tlâk hlumpui zo mai dâwn a lâwm!

Khawthlang sawrkar lian pawh thlâwp lo, communist pawh thlâwp lo nia lan kan duh a, non-align pâwlte Nehru-a chuan a han din thul a, communist nih chu a duh si lo a, India mite hian an zui duh loh a hlau a ni ang. Chuvangin a sawrkar din chu secular sawrkar a vuah a. He sawrkar hian sakhuate hi a enga mah duhsak bîk a nei dâwn lo, inang tlâng vekin a en dâwn a tihna a ni. India ramah tûnlai hian secular tih chu sakhaw tih bik nei lo tih nân kan hmang ta ber a. Calvin-a chuan he thu hi a hmang hmasa a, ani chuan Kohhran hi sawrkar thilah an inrawlh tur a ni lo, sawrkar lah Kohhran thilah an inrawlh tur a ni hek lo a tihna a ni a. Secular education tih chu Pathian thu leh sakhaw lam zirna ni lo sawina a ni ber. Nehru-a chuan sakhua hi eng mah lo nia a ngaih avangin sawrkar thilah inrawlh tlâk a ni loin a ngai a, ‘Pathian tel loa kan awm thei ang bawkin sakhaw tel lo pawhin kan awm thei a ni’ a ti niin a lang ber. He ngaihtuah dan hian Pathian tihna a nuihzat a, sakhaw min phuar thintu hrui a zai chat a. Tichuan India ram pum hian Pathian tel loa hmasâwn kan tum ta tlung tlung a, sum leh pai lama kan dinhmun a thatna tur kawng kan ûm ta ruak ruak a. Nehru-a thil thlir dan hian min kaihruai nasa hle. An sum leh pai dinhmun a that tâkah chuan tu pawh kan ngaisâng ta niin a lang, engtin nge sum a hmuh dan, a dik em, a thianghlim em tih kan ngaihtuah hlei thei tawh lo. Pathian tihna leh sakhaw ngaihhlutna a tlem tâk avangin tualthah te pawh kan pawiti nêp ta. Titi-a kan dawn mai mai a ni a, kan sawrkar (India) milian, politics lama hotute chuan an kawng dal chu an sâm mai zêl niin an sawi. Heti chung hian sakhaw mi ni awm taka lan kan tum a, sakhaw ngaihsak nia lan chu intuamna kâwrah kan hmang a. Farisaiho kan ang viau a ni. He kawng zawh tur hian inzirtîr tehchiam a ngai lo, kan puten an tih chuan ngam takin kan ti ve ta zêl a nih hi. Sum leh pai ngawt ûma phêt huai huai hi kan hna ber a ni ta emaw tih tur a ni. Tu mah dem bîk tur bîk kan awm lo, kan inang tlâng vek a ni. India ram pumpui hi materialism an tih, thlarau lam thil pawisa lo nun chuan min tuam ta a. Sum ûmin kan phe ta suau suau a nih hi, a nei tam tawhte lahin tam tâwk tih an nei chuang hek lo.

Hei hi khawvêl puma boruak lêng a ni a, kan lo hîp ve alâwm a tih theih. Sâpramte pawh Kohhrana inkhâwm tur pawh an awm thathum tawh lo a. Nawmchen bawl lamah an in hmang suau suau a ni lâwm ni? A ni viau, mahse England chu khawvêl ram corruption tehnaah chuan a 9-na vêl an la tling pha a, India ram erawh chu a 80-na vêl kan ni.

Communist inzirtîrna ang taka din, Pathian tel loa din sawrkar Russia chu a keh chhe tawh a. China erawh chu a la ding hrâm hrâm. Hemi thuah hian Laodikei Kohhran hnêna thuchah kha kan tâna thuchah a ang hle, ‘I lum emaw i vawh emaw ka duh a ni’ tih kha.

India ram political party zîngah BJP hi an ngaihsanawm hlein ka hria, Hindu an nih an zêp lo. India ram hi Hindu rama siam an duh a ni. Keini Kristiante pawhin India ram hi Kristian rama siam kan tum a ni lâwm ni? Kan thu dawn hi a dik nia kan hriat chuan eng nge hlauh ukan neih? Kan thu leh kan nun hi kan inbeihna tur mual a ni. BJP hotu lawk pakhat Advani thusawi chanchinbuah a lo chhuak a, hetiang hian a ti, ‘Sakhua hi sawrkar thilah a inrawlh tur a ni lo, sakhaw mite erawh chu sawrkar hruaitûah an awm a tûl a ni’ a ti. India ram awp an tumnaah hian Pathian tihna tela awp an tum a ni. Pathian thu an pawm dan chu kan pawm dan nen a inang lo thei ang, a pawimawh chu kan hriat chin chin Pathian thu kan zawm hi a ni. Thuthlung Hlui kan zirna lamah Pathian thu nia kan ngaih theih loh thil tam tak a awm, mahse Pathian thu nia an hriat avanga zawm an tumna kha Pathian tilâwmtu ni berin a lang.

Kan ram Constitution hian sakhaw zalenna a puang chiang kher mai, an constitution meuha hetiang khawpa zalenna puang chiang hi eng ram mah a awm lo. Constitution-a chuang hi Kristianten chak taka an nawr vang a ni. Constitution siamtu tam tak khân an pawm hreh a, mahse Nerhua khân a a rawn thlawp chak êm avangin an telh ta a ni. Hetia telh tawh hi chu thiat leh theih a ni lo; sawrkar eng pawh lo ding se, an thiat thei tawh lo, Hei hi India khua leh tui zawng zawng tân Fundamental Right a ni. Fundamental Rights zînga tel thil thenkhat hi Pi Indira Gandhi khân emergency a puan khân a thiat a, mahse Supreme Court-in a phal thei lo. Hemi thiat tur hi chuan Parliament mai lo, rama mi zawng zawngin, an vote thlu tur a ni awm e. Kan sawrkar hruaitute chu eng sakhaw bia pawh ni se sawrkarna an chan atangin sakhaw dang an nêkchêp thei tawh lo tura ngaih an ni. Kristianho hi an vâk chak a, ram pâwn lama miten an rawn tanpuiin therhlo pawh an nei thei a, mi tam tak an tih-Kristian phah nia ngaiin Hindu tam tak chuan an ngaimawh hle a. Kan Constitution kalh si loa Kristiante harsatna siamsak dan an ngaihtuah a, dan an siam a, sakhaw zalenna dan an vuah a. Sakhaw danga pakai tur chuan ama duh thu ngeia pakai a nih, rorêltu magistrate hmaah a thlen hmasa tur a ni tih a ni ber. Mi a lo piang thar a, magistrate hnênah pianthar phalna a la tur a ni tih ang deuh a ni. Ka hre sual a nih loh chuan Orissa sawrkar, Congress sawrkar chuan hetiang dan hi a siam hmasa ber. Arunachal-ah phei kha chuan hetiang dan siam leh hman hi a titu bulpui chu Congress sawrkar a ni. BJP an lo lal khân Gujarat-ah hetiang dan hi an siam ve bawk a. Janata Dal lal lai khân India ram pum huapin chutiang dan chu siam an tum a, Setana Bill kan ti a, kan duh lo tlâng hle a, an ti ngam ta lo a ni.

Ram chhûnga Hindu an tam zâwk chhûng hi chuan sakhaw dang biate chu a theih ang chin chinah min nêkchêp an tum ang. India Kristiante hian ram pâwn tanpuina kan dawng hnem êm êm a, thawktu tam tak hlawh pawh khawthlang lam mi rawn tum a ni. India sawrkar hian tangka kan dawn hi min tihtawpsak ang tih kan hlau a ni. Pi Indira Gandhi hun lai khân hemi control-na thupêk an siam a. Ram pâwn atanga pawisa kan dawn chu a hrana chhinchhiah a, sawrkar hmuh theih mai tura account neih tur a ni. Tangka hmuh tihtlem luih emaw phal chin neih emaw erawh hi chu an la tum lêm lo. India Kristian tam takin an sum dawn hi tihtlemsak an hlau êm êm, Congress party hian an ti lo ber ang tih ringin an tan deuh a ni awm e. BJP an lo lal khân Kristian tam takin an tihtawp an hlau hle, amaherawhchu anni pawhin Congress ang bawk khân tihtawp chu an ngam bîk lo, titawp se India ram pumpui sum dinhmun a nghawng thei dâwn tih an hria a ni.

State kan ni ve ta a, sakhaw zalenna hi keini pawhin sawi uar mah ila sakhaw dang bia chu nêkchêp kan hreh lo a ang khawp mai. Kan hriat mang loh hlanin an lo chêp viau mai awm mang e. Assam Rifles rama mandir thiah luih kan tum a, silai thawh lo se kan tichhe hneh hle awm e. Tuiriala an milem paih pawh kan phal lo dâwn mai a va ang ve? Kristiante avanga India rama ram dang pawisa lo luang lût hi a tam tham hle, chumi rinchhana dingte chuan an tihtawp hlau awm rêng an ni. Titawp se kan tân a tha zâwk ang em? Hun eng emaw chen chu kan buai hle ang. Foreign pawisa innghahnaa hmangtute an mangang lehzual ang. Titawp mai lo tura an rin deuh political party chu inthlannaah tling ngei se tih pawh an duhzia a lang. Pathian duh dan nia lang chu kan lum emaw kan vawh emaw a duh a ni, lum pep pup kan nih reng a duh lo. Communist party-ho hi secular invuah thei dik tak an niin a lang, mi rethei leh hnathawktute tantu niin an insawi bawk a. India ramah hian darh zau viau awm, a darh zau thei lo, Pathian tel lo programme an neih vang a ni thei ang, India mite hi Pathian tih mi tak kan lo ni.

Politics kan sawi kai a, Isuan sawi uar a tum ber chu thudik tar lan ngam loh te, thil dik lo sawi ngam lohte hi kan hlauh tur chu a ni. Farisaite vervêkna a tar lante hi pâwn lam fai ngainaa chhûng lam tawp hle si leh sakhaw thil phût sawma pakhat pêkte ngai pawimawh a, ‘dik taka tih leh hmangaihna ngaihthah’ si te a ni. Farisai leh chhiahkhawntu tawngtai Isuan a sawi a, Farisai chuan danin a phût zawng zawng a tih vek thu a chhuang hle, a chapopui hle, a inngaisânga, thiam loh a chan phah ta. Chhiahkhawntu erawh chuan Pathian hmuha mi sual a nih a inhria a, a tlâwm rawih rawih a, thiam a chang ta zâwk a ni.

Isua hian sakhaw lam inhman tlut tlut hi a ngai pawimawh lo emaw tih mai tur a ni. Suamhmang sawisak, kawnga let der chu Putihiam leh Levia chi, sakhaw rawngbawlna lama an tihtur zawng zawng ti zo tawh, in lama chawl tura hawte chuan an hmu a, hmuh ve an hlau ni awm tak a ni, a bulah pawh kal loin an hêl a. Samari mi, mi sual leh tenawma an ngaih erawh chuan a rawn hmu a, a mihringpui nena an inkâr tihfel a tum a, a hliamte chu damdawi a hnawih a, a damna tur kawng a zawnsak a. Thupêk ropui ber an zawh khân Pathian hmangaih thu a dah hmasa a, a dâwt, a tlukpui chu mahni inhmangaih anga vêngte hmangaih tur thu a telh a, an zawh bâk a telh lui hrâm a ni. Sâp hla pakhat Abou Ben Adem-a tih kan zir thin a. Zan khat a mumangah angel lehkha ziak hi a hmu a, eng nge a ziak tih a zâwt a. Angel chuan , ‘Pathian hmangaihtute hming’ tiin a chhâng a. ‘Pathian ka hmangaih pawh ka hre si lo a, mihring erawh chu ka hmangaih thin, mihring hmangaihtu hming i ziak hunah ka hming telh ve ang che’ a ti a. A tûk zanah angel chu a hmu leh a, a hming ziak tlar pawh chu a entîr a. Pathian hmangaihtute zîngah chuan a hming a lo chuang hmasa ber a.

Isuan hun hnuhnung thu a sawi khân, sakhaw lama inhmang nasa, ‘Kan ei ho a, kawtthlêrahte i thusawi kan ngaihthlâk thin kha’ titute chu mi tê tak tê chunga an tih tur an ti lo a dem a nih kha. Farisaite a ankhumna pakhat hi a mak hle, ‘Hmeithai sum in ei zawhsak’ a tih hi. Hmeithaite hi khawvêla mi rethei berte sawi nân an hmang. Pathian tih a, hêng hmeithaite hi hmangaih awm takin an lang a, an sum an ei zohsak si, an khawngaih tak tak hauh lo. Thu buai hla buai an neihin tlawn emaw tham fe emaw an ngai a ni thei e, an retheih avangin mahni in an nei zo si lo, hêng mi hausate in hi an luah a, a luah man an thing tawk tawk pawh a ni ta ve ang, an pêk theih loh leh hnawh chhuahah an vau si. Hetianga an vervêkna hi a ni hlauh tur chu. Hmasialna hi sual a ni lem lo, nausênte chuan an mahni ngawt an inhria, an mamawh chu pêk ngei an ngai. Khawvêla kan dam khawchhuah theihna turin hmasial hi a ngai a ni. Hma kan sial hian mi dang ta a sut hêk hian a pawi ta thin a, sual a tling thei ta a ni. Rinna thuahte a inrinkêp theih loh, mahni tâna chakai khawrh tih ang deuh a nihna lai a awm. Isua zirtîrna a danglamna êm chu, ‘Mahni tâna zawngtu chuan a chân ang a, keimah leh chanchin tha avanga chân chuan a hmu ang a’ a tih hi a ni. Hei hi kan hmaa awm, kan nun target chu a ni, hemi aia hniam hi hlauh ber tur chu a ni.

August 2004

Thulakna: www.revzairema.com

Cheraw Kan Nana Senso Rs. 15.50 Lakhs

Mon, 27 Sep 2010 17:03:00 +0000

Mizoram atanga nula leh tlangval Commonwealth Games-a cheraw kan tura kalte tana senso tur sawrkar laipui atangin sum hmuh a ni lo tih Art & Culture Minister Pu P.C.Zoram Sangliana chuan nimina Mizoram Assembly inkhawma Pu K.Liantlinga zawhna a chhannaah a sawi a. An senso chu state sawrkar sum atanga pek a ni a, Rs.15.50 lakhs a ni a ti. A kal turte chu Selection Committee thlan an ni a, an san dan bituk pawh he Committee-in a siam a ni a ti.

Thulakna: Mizo Aw

ASSEMBLY REPORT 27TH SEPTEMBER

Mon, 27 Sep 2010 16:38:00 +0000

Mizoram Legislative Assembly parukna, an thutkhawm vawirukna chu President lo zin avang leh Pathianni a tlak avanga ni li zet chawlhsan hnuin vawiin chawhma khan chhunzawm leh a ni a. Zawhna chhan tur sawmhnih chhawp chhuah zinga paruk te chu Minister hrang hrang ten an chhang hman a. ZNP Member Pu Lalduhoma put luh “Mizoram Sawrkarin Lo neitute tan Leitha (Fertiliser) a ngaihtuah sak thin ang khan, ngaihtuah sak leh rawh se” chu sawiho a nih hnuah lungrual tak a pawm a ni a. Congress Member Lt. Col. Z.S.Zuala put luh “Infiamna lama Mizoram thalaite hmasawnna atana kan sawrkar hmalakna hi lawmawm kan ti” tih pawh pawm a ni bawk.Vawiin Assembly Session zawhna leh chhanna huna thu langsar deuh te chu India leh Bangladesh ramri hrul pal pin in a nghawng avanga khaw 45 lai suan chhuah an tul thu ah Minister chuan hei hi sorkar laipui mawhphurhna a nih thu te, Mizoram sorkar pawhin rawtna a thehluh nghah mek a nih dan te House a hrilh. Zawhna dang chhangin Home Minister Pu R Lalzirliana chuan Mizoram sorkar in INSAS Rifle, sangkhat zahnih sawmriat (1280) chu pakhat cheng 28,352 zelin a lei tawh thu a sawi a. Mirethei chenna In sak ruahmanna atan 2010-2011 chhung hian cheng nuai 263.12 hmanral a nih tawh thu UD&PA Minister Pu Zodintluangan zawhna chhangin a tarlang bawk. - DIPR

" Mim Kut " Tluang Takin Hmang , Thlaichhiah Atangin Rs. 5265 Cancer Veite Tan Hlan

Mon, 27 Sep 2010 15:46:00 +0000

Mimkut Organising Committee huaihawtin vawiin khan Vanapa Hall-ah Mim Kût hman a ni a, chhungte thi tawh, mi engemaw-zat kalkhawmte chuan hmanlaia an tihdan angin thlaichhiah an nei leh a. Thlaichhiah atana an sum thawhkhawm Rs. 5,265 chu Cancer Society of Mizoram hruaitute hnenah an hlan a. He hun hmangtute hian Mizo thawmhnawin an inchei a, kût an hman chhungin Darkhuang an vaw reng a, thupui pahnih ngaihthlak a ni bawk.

Inkhawm hi B. Lalthlengliana, Mimkut Organising Committee chairman-in a kaihruai a, thupui pakhat, 'Mim Kût leh Kristianna’ sawitu Vanneihtluanga chuan, ‘Pathianin kan pi pute tana a lo ruat -sak Mizo kutte hi tunlai mite hian kan nunpui mai tur a ni a. Mim Kut kan hman avangin kan kristianna leh kan Mizona a dalna chhan tur a awm chuang lo’ a ti a. Thlaichhiah chungchang sawiin, ‘Tunlai mite hian midangte tana malsawmnaah kan chantir a, eng kût pawh nise, kan kût hmante hi midangte tana malsawmna lo ni rawh se’ a ti bawk.

Hnam chhantu president Ramhmangaiha chuan ‘Mim Kût Pawimawhna’ tih sawiin, ‘Mizote kût chi thum hian tlang hrang hranga Zohnahthlakte min phuar khawm a. Heng kutte hi khawtlang zia leh India ziaa kalpui chi a ni lova, Pathianin Mizote hnena a pek liau liau anih avangin Mizo taka kan kalpui mai a ngai a ni’ a ti a. Mizote kûtah chuan sakhuana pawh a len thu leh Mizo kût 3 chu Pathianin Mizote tana ramri a kham a ni a ti a, ‘Mim Kut hman hi a zahthlak lova, Pathian hnenah lawmthu i sawi ang u,’ a ti bawk. Hnam Chhantu hian kum 14 chhung anmahni pualin Mim Kut hi an lo hmang tawh a ni.

Thlaichhiah atanga sum tling-khawm dawngtu Cancer Society of Mizoram hruaitute chuan cancer chu natna tihbaiawm leh khirh a nih thu te, Mim Kût hmangtuten lainat taka an thlaichhiah tlingkhawm an pe chu an lawm takzet tih an sawi. Vawiina Mim Kut hmannaah hian zirlai engemawzat an tel a, mipui an kal tha hle. Art & Culture minister chuan a thlawnin Vanapa Hall a hman tir bawk.

Thulakna: The Zozam Times

Aw Khawnge , Lung A Va Leng Em !?

Mon, 27 Sep 2010 15:28:00 +0000

Savate hi kan ram timawitu leh mihring tan pawh hmuhnawm leh rilru tihlimtu a ni mai lo a.Kan thu leh hla-ah hmun pawimawh tak a luahin lungrualna leh lunglena leh hmangaihna sawi fiana tehkhinna nungcha pawimawh tak a ni.Mahse chungleng sava zawng zawng chawi kim lo mah se, kan thu leh hlaa hmun changtu kan ram savate hian kan thinlung lairil fan khawpin thu leh hla chei nan kan hmang a.Heti taka kan hnam thu leh hlaa an pawimawhzia kan ram savate hian hre ta ngat se, lawmthu sawiin kan malah lam thai tak an nap hial awm e.Tunah erawh chu an chenna ram mite ngei hian kan hnam tan an pawimawhna hre chang lo lekin kan kuthlei leh kan hrawk hriam lutuk chuan kan chimih zo ta si a.

Tunah zawng "chung muvanlai len thiam" hmuh tur a awm tawh lo a."Chung kawlngo thla khawng ri " leh "sirva zai mawi" lah hriat tur a awm tawh hek lo. Khawnge "zarva lungrual" leh "thuva awmhar" chulram awitute kha an awm zawh tak le?"Thlangpualhrang" leh "kulva reng ro tin rel thiam"-ten min tinsan zo ta si a."Bawngte palai" tirh tur leh "koh thiam chung huiva" an thlawk bo zo ta si a,khua a va han har ta ngai ve le."Zan tlai nema kangkang, chhimbuk, thangfen zai tin min awitu" thawm a dai zo tawh a.Phai phunchawng par tlan "kulva-thlehhniar chhunrawl zawng" hlim thawm a dai zo ta.Tun ang renga kan kut leh kan hrawk a hlei chuan,kan thu leh hla timawitu leh tihausatu hian hriat a hlawh lo ang a.Kan tawng hi a pachhe sawt dawn a ni.Tunah pawh hian kan thangthar hla tharphuah han enin,nungcha leh khuarel hunpui inherin an lung a tihlen lohzia chu an hla phuah atangin a chiang reng mai.Mizo thu leh hla tihausatu a nih avangin iduat ang u, an hming an hmel pawh hriat i tum ang u.Kan rual u-ten "rimawi ram" ti-a an chawi ram a reh zo ta.

Aw khawnge hmana kan ram awitu leh timawitu sava tinrengte kha an thlawh bo zawh tak?

Cheng Nuai 1 hlawh theihna tur Zoram pum huap zaipawl intihsiak dan tur sawifiah

Mon, 27 Sep 2010 14:24:00 +0000

Vawiin dar 11:00am khan Pu C.Lalrosanga, Director DDK Aizawl chuan I&PR Confe. Hall-ah tualchhunga thuthar lakhawm tute kawm in, ‘Red Ribon Choir Competition’ nrih dan tur a sawipui a. DDKleh AUR lamam hmasawnna tur chhi hrang hrang an sawiho bawk.

Hetah hian thusawiin Pu Rosanga chuan, Electronic leh Print Media te chu englai pawha kalkawp tur leh inzawm tlat a ngaih thu a sawi a. Zaipawl intihsiak puitham tak, Mizoram pum huap a neih tur chungchang ah DDK leh MSACS te chuan an ti ho dawn a, kumin Nov. thla ah neiin, final hi Dec.1 World Aids Day-ah neih tum a ni a ti. Zaipawl tih hmasawnna nana he thil hi buaitsaih a nih thu sawiin, “Zoram dung leh vang ah hian Zaipawl fakna hlasak hi thangchhuak se kan ti a ni” a ti a. Hei hi Kohhran hrang hrang aiawh, State Level Commt. Aizawl-a neih ah an remti tih sawiin, eng kohhran ah pawh remtihnaa awm tawh sa vek tih a sawi. Working Chairman ah amah chu an ruat thu sawiin, zong hrang hrang ah inelna buatsaih a ni anga, hei hi live a remchang dawn lova, a recording erawh a tukah chhuah leh thin a ni ang a ti bawk.

Hlapui, Theme Song neih a nih dawn thu pawh sawiin, tunhnai maia C. Lalzar-mawia hlaphuah, ‘Hun tha a liam hma hian’ tih chu an theme song tur a nih thu a sawi a. Zaipawl tin in mahni hla duhzawng pakhat bakah, hla thlan sa, ‘Ka fak ang che Lalpa, Aw Ka Lalpa’ tih chu in tihsiakna tur a ni a ti. Dis/Zone Level comtt. din a ni anga, an kaihhruaina in Dist/Zone ah in tihsiakna buatsaih pawht a ni anga, Nov.8-19 chhungin neih a ni ang. Lawmman 1st Rs 10,000, 2nd Rs 8,000 leh 3rd Rs 6,000 a awm anga, lawmman dawng pha lo a tel zawng zawng ten Rs 2,000 theuh an dawng anga, a ti tha te chuan DDK contract an hmu bawk ang.

Aizawl ah final round neih a ni anga, 1st Rs 1,00,000, 2nd Rs 70,000 leh 3rd Rs 50,000 an dawng ang. Tel tura inhriattirna form hi Lunglei ah pawh dah a ni dawn a, a hmun tur te chu an la puangzar leh dawn a ni. Heng bakah hian DDK lama hmasawnna tur chi hrang hrang media te ne hian an sawiho bawk.

Thulakna: Ralvengtu

Burma ramah Ymail a hman ve theih dawn ta e

Mon, 27 Sep 2010 09:04:00 +0000

Burma rama Telecommunication lian ber Yatanarpon National Web Portal chuan Burma rama Ymail leh Ytalk lunch a nih tur thu September 6 khan Yangon khawpui Sakura Tower-a meeting an neih tumah an puangchhuah a ni tiin Burma Telecommunication Department-a Senior Engineer U Zaw Mint Oo-a chuan a sawi a.

He Ymail leh Ytalk hi Gmail leh Gtalk anga hman theih tur a ni a, mail hawn pawh a awlsam phah hle dawn a ni. He Ymail leh Ytalk hi tun September thla tawp atanga hman theih beisei a ni a, Ymail User mi pakhat tan hian Data Store-na 200MB a awm thei dawn a, Gmail erawh a tluak chiah thei dawn lo a ni.

Gmail a chhuah tantirh khan Gmail Account nei tawhte chuahvin mi dang tan Account an siamsak thei a, mahse a hnuah chuan mitinin mahni Account an siam theih nan Google chuan hma a la zel a, Data Store theihna pawh 3058 MB thleng a rawn dah ta a ni.

Tun tuma Burma ramin Ymail a lunch tur hi Malaysia Tele Company lian tak IP Tel Group leh Burma rama company lian Inforithm-Maze Ltd., Computing & Multimedia leh Creative Webstudio-te thawhhona atanga an buaisaih tur a ni tiin U Zaw Mint Oo-a chuan a sawi bawk.

Burma ram chhunga lehkha inthawn duhte tan pawh ram pawn atanga an siam Server hman tul tawh lovin ram chhunga server hman mai theih a ni tawh dawn a, Internet Bandwidth kan lo hmante pawh hi a zatve lai a lo thlakhniam phah dawn a, Internet Connection a lo tha lo a nih pawhin he Server hmang hian ram chhungah chuan awlsam takin kan hmang zel thei dawn a, “Ka connection a tha lo” kan tih thin kha a awm tawh dawn lo a ni.

Burma rama Gmail User mi pakhatin Ymail a hman chuan International Bandwidth a titlem phah thei ang a, amaherawhchu ram danga awm Gamil User-te erawh Gmail aia tha bikna a neih hran loh chuan he Ymail hi an hman duh kher a rinawm loh a ni.

Thulakna: Tuivar Khua

Mizoram sorkar khin?naah chak

Mon, 27 Sep 2010 08:28:00 +0000

Mizoram Cooperative Societies Act, 2006 chungchang a, Thangkhuma s/o. Tuikhurliana (L)-in Gauhati High Court-a Mizoram sorkar a khinnaah Thangkhuma hian thiam a chang.

He thubuai remnaah hian High Court chuan September 10, 2010 khan thupek a tichhuak a; Mizoram sorkar chu Mizoram Cooperative Apex Bank Ltd. Board of Directors dinglai (2009-2011) chungchang chu thla thum chhunga chingfel turin a hriattir a ni.

Thangkhuma hian Mizoram Cooperative Societies Act, 2006 chungchangah hian Mizoram sorkar chu Chanmari Pig Producers’ Coop. Society Ltd. hmingin Gauhati High Court, Aizawl Bench-ah MCS Act, 2006 Section 122 Sub-section (1)(b) interpretation (a hrilhfiah dan) a dik lo tiin a khing a; ukil atan Michael Zothankhuma a hmang a, Mizoram sorkar aiawhin Addl. Advocate General, Nelson Sailo a ding thung.

Thulakna: Vanglaini

Naktukah Kawngzawh

Sun, 26 Sep 2010 15:17:00 +0000

Sinlung Indigenous Peoples Human Rights Organisation leh Mizoram hmar tlangdung mipuite huaihawtin naktuk dar 11:00 a.m. atangin Aizawl Chanmari kawn atanga Tennis Court thlengin kawng zawh a ni dawn a, hmar tlang dung mipuiten an chenna chhehvela tuikhuah(dam) tura hmachhawpte kaltlangpui lo tura ngenna kawngzawh a ni. ‘Ram leh hnam humhalhna kawngzawh’ tiin a hming an vuah.

Thulakna: Mizo Aw

Ni 27 September 2010 - Vanapa Hall-ah " Mim Kut "

Sat, 25 Sep 2010 15:15:00 +0000

Naktuk chawhma dar 11 hian Mim Kût Organising Committee buatsaihin Vanapa Hall-ah Mizote Kût zinga hriat hlawh thar leh mek ‘Mim Kût’ hman a ni dawn a, thlaichhiah atanga sum hmuhte chu Cancer Society of Mizoram tanpui nan hlan a ni ang.

MKOC hian Inrinni khan Mim Kût hman an tum chhan hi thuthar lakhawmtute hnenah an hrilhfiah a. Mizote Kut zinga eng kût pawh Mizo te sakhua nen indo lova a kal ho theih an beisei thu an sawi a. Hmasawnnain nunphung a her danglam hret hret angin Kût hman dan pawh a hun laia mite mil leh hriathiam tur ang zawnga hman chhoh tha an tih thu an sawi.

Mim Kût hi mitthi puala hman \hin a ni a, he inkhawmah hian zohnah-thlak boral tawh zawng zawngte sunna hun hmang in, an pualin thawhlawm khawn a ni dawn a, chu chu thlaichhiah vuahin MKOC chuan Cancer Society hnenah hian an hlan tur thu an sawi. Kum danga Mim Kut an hmanna sum lut te pawh Home leh Hospital-ah an lo hlan tawh a ni.

Mim Kut hman tur atan hian Minister engemawzat bakah mi tlawm-ngai te'n senso atan tangkafai an thawkhawm a. Heng thilpek petute leh a thlawna Vanapa Hall hman phalsaktu Art & Culture Minister PC Zoram Sangliana te chungah lawmthu an sawi.

Thulakna: The Zozam Times

Maicham Hydel Project-ah nghalrual tlahlum

Fri, 24 Sep 2010 16:28:00 +0000

September ni 22 zan khan Maicham Hydel Project forebay tuikhuah-ah nghalrual an tlahlum a, he project enkawltuten forest department-ah thlenin, ni 23 zing khan lachhuakin thuneitute remtihnain N. Vanlaiphai-ah a pumin an lilam nia hriat a ni.

Maicham Hydel Project hi North Vanlaiphai chhim thlang lam, North Vanlaiphai atanga km 15 vela hla-ah awmin, nghalrualte hi tui kawng (channel)-ah an lut a, tui khauhin a lak zui avangin Forebay-ah hian an tangkhawm a, 30 rual vel niin thu dawnna pakhat chuan a sawi.

N. Vanlaiphai chhehvelah hian Sa-nghal an tam hle a, YMA lamin tlang hlawm khat chu humhalhin, khua atanga hla vak loah sanghal rual thahnem tak bakah sakei te deuh leh sakhi te pawh an awm niin an sawi.Sanghal te hian thlai an tichhe nasa in, nakinah chuan suat la ngai hial turah thenkhat chuan an ngai. Thlai an tihchhiat nasat avang hian thlai lu manah forest department chuan sum engemawzat a pechhuak tawh tih thudawnna chuan a sawi bawk.

Thulakna: The Zozam Times

MZP-in President Patil an bia

Fri, 24 Sep 2010 15:16:00 +0000

MZP hruaitute chuan nimin ni 23rd September, 2010 khan President of India zahawm tak Pi Pratibha Devisingh Patil chu Raj Bhawan -ah hmuin Mizoram leh Zirlaite mamawh chi hrang hrang an thlen.

UGC- CSIR, NET Examination Aizawl Centre a, Science discipline a tel loh avangin state dangah sum tam tak senga exam bei tura kal a ngai thin a, keimahni ram chhung ngeia exam anih theih nan a hma la turin MZP hruaitute chuan President zahawm tak hi an ngen a ni. Mizoram chu All India Pre- Medical College / Pre- Dental Entrance preliminary examination centre nei lo state awm chhun a nih thu leh final exam pawh North- East huamchhunga neih a nih ngailoh thu te, hemi avanga zirlai tam tak te’n harsatna an tawh thute MZP chuan a thlen bawk a. Hmun kilkhawra khawsa, dawmkan ngai state kan nih avanga a bik taka chhawmdawl kan mamawh thu MZP chuan a thlen bawk. MZP chuan All India Services Examination bei tura Mizo zirlai Delhi-a coaching class kal te’n harsatna an tawh thin thu leh, senso a san thin em avangin mi tam tak exam chak tak takte pawhin coaching hi an zawm loh phah thin a. Dinhmun harsa deuhte pawhin class hi an zawm theih nan zirlai coaching class kal tur te puala zirlai 100 lenna Hostel, New Delhi-a din a nih theihna tura hma la turin President hi an ngen bawk.

Mizoramin Arts, Science, Animal Husbandry & Veterinary, Polytechnic zirna changtlung tak a neih laia Engineering leh Commerce subject-a college a awm loh thu leh hemi avanga zirlaite leh mipui te’n harsatna kan tawh thute, Engineering leh Commerce college Mizoramin a neih ve thuai theih nan MZP chuan President chu a ngenna bawk a ni.

MZP chuan Mizoramah Oil leh Gas laihchhuah tur zawnga hmalak mek a nih chungchang leh zirna leh Training mumal tak Mizote’n kan neih theihna tura hma la turin President hi a ngen bawk a ni.

Mizoram University a School of Social Science a building hrang hrang, a structural design aia tea sak anih avanga zirlai lut tur tam tak an luh theih loh chungchangte an thlen bawk a. Building sak dan chu chhui chiang a, a tul ang a hma la tur leh MZU building sak leh zel tur pawh a tul anga enfiah turin President hi an ngen bawk a ni.

President zahawm tak chuan MZP ngenna hrang hrangte hi tha takin a lo dawngsawng a, a hlawhtlin theih nan bawhzui a tum thu MZP hruaitute hi a lo hrilh a ni.

Thulakna: Vulmawi Daily News

Lalawithangpa Thlan (Editor Thlalak Thlan)

Fri, 24 Sep 2010 11:59:00 +0000

Dothanga leh Thuami fa Hmarlutvunga hi kum 1885 ah Kan hmunah a piang a. Naupang a deuh phian phuang niin inselem chaih a hrat hle a. Amah chu se lemah a tang thin a. A thiante an awm loh pawhin, a chala inhlingin thing bulah a inthlunga; vuak tal turin ni lengin a awm thin. Rawlthar, kum 16 a nihin hla-

Ka dâwn Thangnêmi mah kûr lova,

Ka dâwn loh tlânga lenbuangin;

Lelte a kûrpui reng e.

tih hlaa phuah a. A pa hi lal thian a nih avangin lal inah a tlangnel a, hlain an inpawl khawm thin a. Chumi avang chu emaw ni “Fapa ka neih hun chuan Lalawithanga ka sa ang,” a ti thin a. A lo puitlin a, fapa a neih chuan a hming atan Lalawithanga a sa ta reng a. Chutianga nupui a neih hma pawha a fapa hming tur a phuah lawk avang chuan Hmarlutvunga tih ai chuan Lalawithangpa tih chu a lar ta zawk a ni.

Lalawithangpa hi a thil hmuh leh tawnte leh ngaihtuahnate hlaa par chhuahtir theitu a ni.Lunglen hla, lusun hla, mihring leh thil chanchin te, inphuah elna thleng a hawl kim vek.

A thilhmuh leh tawn, a rilrua awmte awlsam tea hlaa phuah chhuak mai thei mi a ni a.Maubuang khuaa a awm laiin awkin ni a lem a, hlain-

Buang khua a hliap ruai ruai e kan lênna,

Turni ka en thangvân zâwlah;

Awkpa’n khau ang a vuan e.

a ti nghâl mai a.

Tum khat pawh kawng a bo va; a kawng bo chu thua sawi duah lovin hlain

Mual a nuar em ni ka kal thiam lo,

Khualzin âr ang ka vai e Hmingthanchhungpa;

Siali khân riang min ti dâwn mang e.

tiin, akawng bo a bialnuin a khawngaih turzia a suangtuah mai a. Kawnpuia a pem hnuin an khaw hlui Maubuangah kristian a nih hnuin a zin a. A thian hluite chu tun hmaa an tihdan pangngai angin zu inin an lo zai khawm a. An tun hma nun hlui khan a lung a tileng a ni ang, an zingah a va kal ve a. A thiante chuan zu in turin an lo ti a. Ani chuan, ‘Kristian ka ni tawh a, in chi ka ni lo ve’ a tih pawhin, “I in duh loh pawhin i luah kan leih ang,” an tih tlat avang-in, tlem a han lem ve a. Chutah a nihna nen a han thlirin inhmeh lo hlein a hria a, hlain-

An sawi Lal Imanuela ram ka thlen hun chuan,

Min lo zawt ang a, ka hawi hemhawmdawn a ni.

tiin, azu in vanga a Lalpa hmaa a hrilhhai dan tur a puang zui zat nghal a ni. Amah ngeiin a hlate hi a buin a siam a. A hlate hi lunglen lam te, nula phuahna te,Dirialloa nen an inphuah elnate a ni tlangpui. Kum 1918-ah tih tak zeta Pathian thu a awih hnu chuan khawvel lam hla a phuah ta lo va. Kohhran ban tangkai tak ni chhovin,kum 1926 October-ah Kohhran Upa atan Chhim chhak Prebytery, Biateah nemngheh a ni. Mizo nun hlui hla phuah kawnga hnu khartu Lalawithangpa hi kum1965 April 11, zing dar 7:30 khan hrilhhai taka Lal hmaa ding tur a inngaihna Imanuela ram panin, he a khual zinna ram hi a chhuahsan ta a ni.

Thu : Mizo Hlakungpui Mual

Thlalak: Thlalak min present-tu Kawnpui YMA President chungah lawmthu kan sawi e.